【銅鑼灣→葵芳】今年20歲嘅無綫女藝員林穎彤（Bella），齋講個名大家未必識，不過講到係黃宗澤（Bosco）最近嘅緋聞女友「波波B」，同埋喺無綫劇《熟男有惑》扮醜女秘書Betty嗰個，即時知係邊個。Bosco之前被傳同佢搭上，結果俾胡杏兒知道，盛怒之下嗌分手，有傳Bella周圍同人講自己係Bosco女友「波波B」，不過似乎佢係借Bosco過橋博宣傳，Bella大前日佢就同一個疑似男朋友行街食飯。
幫手拎戰利品
當日下晝3點幾，Bella同男友喺銅鑼灣行街街，佢哋有傾有講，行得好埋，睇得出好投契。佢哋喺Gap睇衫，男友仲畀好多意見，最後Bella掃咗兩大袋戰利品離開，男友就負責拎嘢，幾有風度。搭扶手電梯嘅時候，男友仲幫Bella整理秀髮，唔知係佢啲頭髮有啲嘢，定係靚得滯忍唔住摸吓呢！
之後Bella同男友搭港鐵去葵芳，Bella上咗樓放低兩袋衫，而男友就坐喺公園乖乖地等。冇幾耐，Bella急急腳落樓搵番男友，然後繼續行商場，今次到個男仔去眼鏡店配隱形眼鏡，Bella喺隔籬講唔停。行到夜晚7、8點就一齊醫肚，跟住就冇下文，飽暖思床褥，食飽就各自歸家休息喇。
採訪、攝影：羅德光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！