嘩嘩嘩，打到嚟嘞！噚日落過銅鑼灣嘅市民，都會目睹以「呃人MAN」為首領嘅「禍港聯盟」，大模廝樣喺銅記橫行。其實呃人MAN一早抵達香江，早前仲喺港鐵巡遊，慌死人唔知佢已經入侵香港。
噚日佢團隊另外四名成員，終於殺到嚟：公安大隊長禿鷹殺氣騰騰、商膠人張震遠一身慘「綠」、笨忍光攞住碌棍想斬港台、吸血鬼貪湯茅台不離身，個個造型驚嚇。
唔少路過市民將佢哋嘅惡形惡相影低，放上網公諸於世。原來呢班禍港聯盟，7.1會喺白鴿黨攤檔佈陣，同遊行市民正面交鋒，一班白鴿仔號召全港市民7.1上街，齊齊趕走禍港壞蛋。佢哋仲製作咗限量五千份「禍港聯盟」摺紙卡，畀市民將一班壞蛋玩弄於股掌之上，宣洩一番。