蒙面歌手龍小菌除罩揭去神秘面紗，連真名都俾網友起底，原來佢叫蔡小茵，小茵變小菌都幾有趣！
小菌現真身後被讚靚女似苟芸慧，不過佢話自己細個係癡肥兒童：「我有四兄弟姐妹，家姐由細都好瘦，可能我最細媽咪特別錫我，畀好多嘢我食，好似金魚食唔飽，一日食兩公升雪糕，每餐食四碗飯，三年級開始暴脹重70磅，仲因為係癡肥學童接受過訪問。」
大腩傷腰
雖然小菌冇因為肥唔開心，但越大身體越差，佢話：「唔止有睡眠窒息，鼻鼾聲好大，仲因肚腩大令腰骨痛，膝頭關節亦好痛，做唔到運動，最重時有250磅成日俾人笑，同學叫我做豬嘜，老師都幫我改花名Fatty，最受傷害係參加比賽，評判話：『你都唱得幾好，但身形幾龐大。』」
由於健康響警號，小菌決定減肥：「一星期做四、五日gym，早餐食兩塊麥包、香蕉番茄生菜，午餐沙律或薯菜，夜晚食魚雞戒澱粉質。」對於被讚似苟姑娘，小菌話：「苟姑娘靚我好多，社會標準瘦等如靚，但我唔覺自己靚。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange