久未露面嘅行政會議成員李國章，噚晚罕有現身公共醫療醫生協會一年一度嘅晚宴。話佢罕有現身，因為以前都唔見佢嚟呢個活動嘅。唔通傳聞佢會接掌胡定旭，喺10月做醫管局主席係真有其事？所以及早嚟打招呼？但沙皇就自稱，至今冇人揾過佢喎，仲話做慣乞兒懶做官，屋企啱啱多咗個男孫㖭呀。忙住湊孫，又點會出山呢？
之前一直盛傳狼振英想每個行會成員，都負責一個政策範疇，仲有傳做過中大醫學院院長同中大校長嘅李國章，會接掌醫管局做主席。八方噚晚見到沙皇，梗係追問佢係咪有新job？佢初頭猛耍太極，話自己年紀大要退休，之後再被追問時先爆響口，話至今冇人揾佢、嚟緊亦唔會有人揾佢。
然後就笑咪咪自爆，喺美國嘅細仔新抱，啱啱生咗個仔，自己第二次抱孫，仲即刻搵番儲存喺電話張孫仔相同八方分享，一幅有孫萬事足模樣。
暗示肥胡坐多陣
沙皇話𠵱家開行會已經好忙，香港揾人才應該唔難吖，仲意有所指話，主席做咗八年，要退落嚟嘅制度係好，但冇話唔可以再冧莊一年啫，唔通暗示肥胡再坐一會。啱啱獲任港大醫學院新院長嘅梁卓偉都有出席，仲同肥胡言笑甚歡；身為食物及衞生局局長嘅高永文，更加幾忙都要到一到啦。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange