【記者鄧永賢廣島直擊】日本國家隊在洲際盃3戰全敗出局，效力廣島三箭的門將西川周作，昨歸隊操練後坦言，未能為藍武士披甲上陣感到可惜，幸仍獲大量球迷專程到場支持𠱁番，令這位27歲門神下定決心，在餘下的日聯賽事搏命，盼得到日本主帥沙哲朗尼信心一票！
雖然日本在洲際盃踢出令人刮目相看的巴塞風格，但事實是3戰全敗出局，而相比在場拼搏的主將，3場皆在後備席的西川周作更不是味兒。不過，西川前日返國後未有閒着，昨晨主動銷假隨三箭操練，備戰下周日對柏雷素爾的日聯盃8強次回合，而現場約有20名球迷，冒雨前來觀操，當中不乏西川的「粉絲」。
洲際盃得個坐字
對於未獲派上場，27歲的西川難掩失望︰「今次洲際盃令我獲益良多，雖然未能披甲上陣有點可惜，但我會繼續努力，在聯賽表現好自己，爭取正選席位。」他又透露有留意大溪地在洲際盃的表現，大讚他們肯為國家搏老命，而他則睇好西班牙奪冠。
教練戥兩愛將唔抵
至於三箭教練森保一，也為愛將感到不值；畢竟球隊貴為去屆日聯冠軍，卻只有西川一名球員入選國家隊，兼只是現效力比甲標準列治門將川島永嗣的後備，他說︰「日本重用外流球員方向正確，但不能否定本土亦有不少好球員，像佐藤壽人等未能入選也有點可惜，我們都有跟日本足總反映過意見，惟最終決定權當然還在沙哲朗尼身上。」
直擊花絮
賣走駒野夠錢起新場
三箭雖稱不上係傳統勁旅，但就絕對係日聯「兵工廠」，而現效力磐田山葉嘅駒野友一都係佢哋青訓產品之一。據三箭「青訓之父」中山正剛（圖）透露，球隊賣走駒野之後，筆錢就用嚟起咗個人造草場。
會長唔撈都要睇波
廣島三箭球迷組織「Ursas」會長三戶寬光（右），坦言自12年前愛上三箭後便不能自拔，不惜請假去外地支持球隊作客賽事，包括早前到南韓及澳洲睇亞冠盃，「如果公司唔畀請多幾日假，就索性辭職！」
神舍住持爆森保一迷信
港甲開操定必拜神，祈求新球季順風順水；三箭都有呢個習俗，開季前會集體到神舍祈福。據神舍住持波多野邦彥（左）話，球隊教練森保一季中都會不時一個人嚟祈福，估唔到呢位少帥都咁迷信喎。
