利物浦話晒係英超大會，但對上4季都入唔到前4，所以佢哋都好希望可以喺新一季重振雄風。7月都未到，紅軍領隊羅渣士經已簽入4個新兵，但我求大俠橫睇掂睇，都唔覺得佢哋有乜嘢本事，真係擔心羅渣士好似前領隊杜格利殊咁，俾人搵笨囉！其實時間大把，使乜咁急呢。
喺英超Big 6之中，利物浦係今夏最積極嗰隊；之前佢哋就簽咗科特迪瓦後衞高路托尼、西班牙前鋒伊亞高艾斯巴斯同中場雷斯阿爾拔圖，加埋禮拜二正式由新特蘭以1,000萬鎊引入嘅比利時門將米洛列特，今夏就已經執咗4件新兵返嚟，使費仲增加到2,380萬鎊。
聽講羅渣士仲未夠喉，諗住再用2,200萬鎊，買埋薩克達嘅阿美尼亞國腳中場米希達利恩。米希達利恩亦冇如期喺禮拜一出席薩克達嘅季前操練，有傳佢反而飛咗去利物浦傾轉會；而薩克達表明立場，如果米希達利恩呢幾日再唔蒲頭，就會對佢進行紀律處分㖭！另外紅軍又睇中咗𠵱家踢緊世青盃嘅巴塞前鋒小將迪路菲奧，幾乎想換咗大半隊陣容咁。
眼光唔好得過國王
利物浦呢幾年成績咁差，好大程度係因為佢哋買人買得差。前領隊「國王」杜格利殊喺前年夏天，斥巨資4,500萬鎊買咗佐敦軒達臣、查理阿當同達寧，令紅軍俾敵對球迷笑咗幾季。講真，頂替杜格利殊嘅羅渣士，眼光亦唔見得特別好，去夏花咗成2,550萬鎊簽咗波連尼同祖阿倫，結果係點？相信都唔使我求大俠多講啦。
米洛列特前途繫於連拿
睇番紅軍4個新兵，由曼城免費加盟嘅高路托尼，經驗係有，但弊在成32歲，年紀唔細之餘，水準仲跌緊；而分別來自切爾達同西維爾嘅伊亞高艾斯巴斯同雷斯阿爾拔圖，前者大部份時間喺西乙比賽，後者嘅西甲經驗都唔夠10場；米洛列特算係最似樣嗰個，但係如果連拿唔走，佢都幾難有得發圍喎。
站喺球迷角度，如果利物浦可以搞番起，有能力同曼聯、車路士、曼城、阿仙奴同熱刺鍊過，梗係好事啦，但我求大俠真係好擔心，佢哋到頭來又係陪跑囉！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange