【中環→金鐘】現年38歲嘅影后周迅，早前同胡軍、湯唯、秦海璐等內地藝人一樣，用咗優材計劃成為香港人，聽講近期佢仲喺金鐘高檔住宅式酒店租咗間房長住。已經係香港人嘅周迅，本周日夜晚7點鐘，同男助手去咗中環ifc嘅國金軒中菜館開餐，二人飲飽食醉，餐飯食到大概8點零鐘就離開。
走嘅時候，周迅怕畀途人認出，一行出餐廳就帶住個口罩，國金軒仲派咗位職員護送佢落樓，睇嚟係要避開人多嘅地方，等佢唔使俾人打擾。不過行咗兩層樓之後，位職員都唔係好識路，要反問ifc嘅工作人員，最後位職員都不負所託，送咗周迅落地下嘅的士站，仲等佢哋上埋的士至離開，周迅架車就駛返去金鐘。
到咗星期一兩點幾，周迅戴住帽、以一身街坊裝同男助手離開金鐘寓所，上咗架輕型客貨車。之後架車直駛去柴灣一幢工業大廈，等電梯期間，周迅同助手全程以普通話交談，最後佢哋去到樓上一間電影公司。
街坊裝試造型
大概6點半，周迅同助手先離開，睇嚟佢此行係為新戲試造型，最後佢哋坐客貨車返金鐘寓所。
採訪：陳辰、藍文浩、李志明
攝影：徐錦池、梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！