高達斌自吹過往幾十年從來是政圈人物，是擁有民主理念的人兼匯點創會成員，所有出名的泛民人士司徒華、李華明、楊森、梁國雄，甚至前匯點成員張炳良及建制派都是他們的老友記。這位政治變色龍，原來最終目的還是希望加入共產黨，「我覺得做共產黨員唔係乜嘢羞恥！有啲人都鍾意做國民黨黨員，好似黃毓民都係國民黨，有乜問題？」
高達斌在理大修讀紡織學系，自稱做過理大學生會，讀書時已經在政治圈打滾。八十年代，有份創立匯點，是最早組織保護釣魚台行動的人。至匯點成立港同盟時，他便退出匯點。接着的政圈生涯，高達斌自詡曾替建制派助選成功，又替黃英琦助選，新民黨的田二少田北辰去年更叫他加入新民黨，最後高達斌「畀面」加入，並替他在競選期間派傳單。
他又說，在80年代是新華社（現稱中聯辦）的區事顧問，還代表香港與當時新華社香港分社社長許家屯吃飯。記者着高達斌提供剪報了解其昔日風光，他即縮沙說「唔想高調」。記者向學界老鬼蔡子強打探高達斌，獲覆「無聽過呢個人」。
辛苦打滾，高最想有人垂青，入到共產黨。「我都好想入！我唔怕入共產黨。」記者問為甚麼覺得光榮？「點解唔光榮呢？我覺得中國人能夠找回尊嚴，國土唔受外國瓜分。總之將呢班中國人重拾正軌，佢有乜唔好呀？」