無綫套新劇《守業者》好似幾多災多難咁，前晚男主角馬浚偉拍一場動作戲時，同對手對打，點知俾支槍掟中左眼角同個鼻，即時爆缸見血，嗱嗱聲入醫院照X光，證實有兩處骨裂。除咗馬仔外，之前女主角楊怡早前都自爆瞓咗兩日醫院，原來係因為頸椎有事，痛到郁唔到。
受咗傷嘅馬仔要停工休息幾日，等個鼻冇咁腫至可以開番工，噚日佢喺電話度話：「真係意外，唔會怪任何人，原本我係要踢開對手把槍，點知佢手指尾勾住把槍，連槍揮拳打落我塊面，即刻流晒血。」痛到入心嘅馬仔慶幸今次只係傷咗左眼，如果打中右眼就大鑊，佢話：「拍《勇往直前》時撞甩過右眼視網膜，如果今次再傷右眼，我諗我要同隻眼講拜拜，要退出娛樂圈。」
嚴禁打乞嚏
呢幾日馬仔要小心養傷，甚至連乞嚏都唔打得，因為眼角嘅小小疤痕容易搞掂，但鼻骨處理得唔好就會歪，馬仔最自豪有個靚鼻，所以要好好保住。其實除咗佢同楊怡有事，同劇嘅曹永廉又經常話只得三幾個鐘瞓，問到馬仔覺唔覺呢個劇阻滯多多要再拜神？佢笑住話：「我信教已經祈咗禱，但如果其他同事覺得有需要咪做囉！都係咁啱咁橋啫，可能個劇叫《守業者》，正所謂創業難，守業更難嘛！」
另外，同劇嘅麥長青（麥包）前排屋企又燒fuse，搞到屋企冇電，佢就話小事：「唔覺個劇多阻滯，不過如果同事覺得有需要咪再拜神囉，總之大家開工都小心啲。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange