「我有疤，可是我很堅強！」以行動改編台灣歌手趙傳多年前名曲《我很醜，可是我很溫柔》嘅，正係「牛下女車神」李慧詩（Sarah）。佢噚日喺北京全國場地單車錦標賽，個人歷史性攞到凱林賽金牌；雖然右眼角仲留低4月炒車嘅疤痕，但鬥志十足，勁！今次仲為佢9月全運會同10月新一季世界盃，打下一支強心針㖭！
倫奧凱林賽銅牌嘅Sarah，今年4月喺浙江全國冠軍賽嘅凱林賽炒車，眼眉上面條疤痕都仲未好番；今次全國錦標賽係傷後第一擊，而且踩得漂亮；前兩日已經攞咗兩面銀牌（500米計時賽同爭先賽），噚日更上一層樓，勇奪金牌。
關鍵時刻「推車」成功
噚日凱林賽，Sarah頭兩輪都係以第1名晉級，壓軸決賽共6人，雖然倫奧凱林賽銀牌郭爽因為去咗國外訓練而冇出戰，但決賽一啲都唔易應付；Sarah一開始就採取主動，積極搶佔第1位；進入最後375米嗰陣，河北李雪梅由第6名超越Sarah嘅領先位置；去到尚餘280米，Sarah加速追趕李雪梅，另外徐玉蕾就死跟Sarah。最後50米，Sarah再發力，最後Sarah、徐玉蕾同李雪梅3個車手一齊衝線，「牛下女車神」喺關鍵時刻用雙手緊握車把，將車用力推向終點線，終於如願奪冠；而徐玉蕾同李雪梅就分奪亞、季軍。
港隊贏兩金兩銀一銅
今次港隊喺全國錦標賽總共攞走兩金（另一金係倫奧代表蔡其皓嘅記分賽）兩銀一銅；而Sarah會繼續留喺北京，準備參加星期五開始嘅國際車聯一級場地賽，爭取10月新一季世界盃賽積分，正喺北京訓練嘅教練兼大師兄黃金寶，會同大部份師弟妹，包括郭灝霆、蔡其皓、黃蘊瑤等返港，參加4日後喺新娘潭舉行嘅香港公路單車錦標賽。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange