美國電子監聽專家史諾登自5月20日秘密來港，卒之在6月22日飛走咗，憑何俊仁（何謝韋律師事務所）、維基解密之法律團之助，得俄羅斯當局允許，及香港特區政府借文件往來時間差之便，隻眼開隻眼閉，詐作睇唔到，於是史諾登可以「合法地出境」，登上俄羅斯航空公司客機，飛去莫斯科，在機場由厄瓜多爾大使館專車接走，之後自莫斯科轉古巴，相信最終目的地係厄瓜多爾。不過最新消息係史諾登玩失蹤冇上機，令環球記者撲空。小國厄瓜多爾位於南美與西北一角，面臨太平洋，風景怡人，美女甚多，生活費便宜，有大把美國退休人士在此享受退休生活，史諾登如在此渡其餘生，冇乜可以埋怨。
只不過，美國呢位巨無霸大阿哥隻手伸得好長，為了殺雞警猴，斷不會放過史諾登，肯定會威逼利誘，暗地裏施壓，係要厄瓜多爾交人。厄瓜多爾現任總統哥利亞以委內瑞拉查韋斯為師，傾向社會主義經濟政策（即係話經濟遲早玩完），外交上與美國對抗，但委內瑞拉有豐富石油資源，有恃無恐，厄瓜多爾亦有石油，但規模不大，況且美國大力發展頁岩氣，逐漸容許岩氣輸出，故此能源專家多數預測石油價格在以後十年易跌難升，影響委內瑞拉與厄瓜多爾生計。奧巴馬總統容許美國頁岩氣出口，推低全球能源價格，有其政治計算，石油輸出國不能再呼風喚雨嘅話，美國在國際話事權更加大啦！如果史諾登逃往其他國家，美國照樣會大力施壓，要庇護國交人，最終恐怕天下之大，史諾登無處容身，不排除要逃亡到古巴定居！
香港送走史諾登，可鬆一口氣，不用捲入政治漩渦，但美國參議員舒馬（紐約州）及白宮發言人已經表示對香港強烈不滿，以後美國對香港有甚麼小動作，頗難預料，最大可能性就係視香港為中國城市，不是國際城市，與香港商討金融貿易問題，態度會從寬鬆變為從嚴。美國領事館對香港民主人權等問題，以後嚴厲批評會多啲，令北京不悅，但梁振英與西環邊會理得咁多吖，你估香港能夠不服從中國嘅外交利益乎？北京與普京偏要落奧巴馬面子，美國又點奈得何！