十個賣衫九個輸，股民早已遺忘的包浩斯（483）竟然大賺三成，睇真啲原來有特殊收益，經常性純利跌8%，不過喺息誘下終於令股價翻生，應該仲有得去，最大功臣梗係自家品牌Salad賣得好，亦好老土咁說明「有麝自然香」。
誰說不是？前幾年旗下品牌Tough搵天真嬌賣廣告都算，之後仲賣埋啲成身夾廣告，真係太睇得起港人的「重口味」，今次Salad只不過搵咗個唔識的索模，加埋幾隻「卡哇伊」狗仔，效果真係天與地，起碼由返緊學嘅𡃁妹以至「潮爆」嘅家母都係佢客仔，可見product掂、廣告啱，要賺錢未必太難。
包浩斯家陣情況只可以用蝕得冇咁痛嚟形容，中、台業務拖累其毛利下跌5.3個百分點，強國經濟放緩不能再向北望，建議不如做好品牌同搞網好過。
好似Samantha之前去美國濕平咁，若果品牌啱的話，返到香港照上網追買，實現品牌和顧客零距離，將貴到飛起的舖租用嚟發展網上購物業務好過！
Samantha
本欄逢周三、五刊出