傳媒問我有關「梁震嬰打小人」，我在趕電影後期天昏地暗，所以專欄回應：這是《迷離夜》其中一個故事《驚蟄》的片段。小說中有這位江湖大佬，因為他當黑爛尾又被人阻上位，好㷫，便到鵝頸橋兇狠打小人。大佬沒名字，不過導演陳果找了盧海鵬（我偶像）來演，他貪玩，臨時改了與689同名（我做配音和字幕時給寫了「梁震嬰」），與神婆邵音音對手戲，精彩。
有些BB出世父母驚養唔大，都愛改大牛、細狗、烏豬……之名。世上有個BB，呱呱墮地就滴冷汗打冷震，根據坊間古老習俗，改個「震嬰」小名以示粗生粗養消災解難吧。
香港七百萬人，同姓同名同音不少，自由社會自由取名──如果有一位「梁震嬰」先生，出示有效身份證明文件，我答應：送你100張戲票（《迷離夜》和《奇幻夜》各50張），或包戲院一場請你嬰哥家爺仔乸姨媽姑姐一齊睇戲。誠信為重，決不「唔記得、唔清楚、唔評論、冇回應、冇補充、處理咗」。七一遊行前後快聯絡。自由行同胞都得，別造假，非誠勿擾。