【中環直擊】
恒指絕地V彈，幾乎重上二萬點心理關口，除了股民高興，一眾經紀亦忙過不停，恍如劫後重生般一樣，密密接買單Call。記者於中環的證券行進行直擊，發現氣氛與一星期前大相逕庭，似乎一眾散戶已開始入市博反彈。
買九倉和黃 唔吼中行
「今朝個電話係咁響！其實好多散戶忍咗好耐㗎啦，今日一反彈，就即刻打嚟換馬兼撈底。」經紀呂先生精神奕奕地表示，認為今次不算是海嘯，不少散戶已部署將資金分批入市，由二、三線的中資股，轉戰質素較高的國企股。他表示，大陸今時唔同往日，新班子政策難以捉摸，令到不少投資者「唔再晒冷入市」。
至於當了50多年經紀的陳先生則表示，恒指跌穿二萬大關時，明顯見到市場恐慌，加上沒有利好消息刺激市場，「嗰陣唔畀啲客入貨，唔想佢哋輸到嘔」，但現時則會建議他們先買一些派息吸引的股票，如恒生（011）、九倉（004）、和黃（013）之類的實力股，「但就千祈唔好買中國銀行（3988），又差又慢。」他估計，港股已踏進熊市三期，會於7月中開始靠穩上升。
除了證券行外，銀行股票機前的股民，亦明顯較一星期前多。記者發現，他們輸入的股票編號多為H股，估計已持有不少蟹貨，但神色仍算鎮定，當恒指衝上19900點時，更有股民高呼：「都話阿爺唔會睇住個市死㗎喇！」