現年67歲嘅藝人夏雨認真黑仔，繼今年2月佢喺西貢嘅村屋「雨房」，一個禮拜內兩度被爆竊，估計損失咗成十萬後，到噚日下晝兩點幾，夏雨揸住架平治去到荃灣時，突然被一架大貨車攔腰撞埋嚟，好在只係撞凹咗右邊後座位車門，夏雨冇受傷平安無事，都算執番身彩！
馮仁昭去到荃灣西樓角路事發現場時，戴cap帽嘅夏雨正企喺車旁傾電話，而肇事貨車嘅車頭玻璃就爛咗，夏雨接受訪問話：「當時我諗住右轉去公眾停車場，點知轉咗一半，有架5.5噸貨車撞埋嚟，我懷疑貨車司機收唔切掣，結果撞埋我架車右後座位尾門，車門凹晒兼花晒。」
暫列交通意外
好在坐喺司機位嘅夏雨毫髮無損，警方暫列作交通意外處理，睇雙方司機係咪願意和解，夏雨話：「本身諗住泊低架車去買嘢，之後再去葵涌拍嘢，好在架車仲開到，我𠵱家要趕住去開工。」夏雨𠵱家拍緊王維基新劇《歲月樓情》，佢做完訪問後匆匆揸車走人。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange