亞視收視雖然得嗰一、兩點，早排又俾租車公司入稟申請清盤，但完全冇影響到亞記嘅「雄心壯志」。今年係亞視56周年台慶，所以諗住搞大佢，聽聞嚟緊除咗開劇，仲準備喺9月開拍旅遊節目，遠赴巴西同墨西哥等國家取景，搵陳啟泰、蔡國威、林紫君、周嘉莉、劉子葱（前名劉家聰）等藝員去唔同地方，唔知係咪見洪永城同黃翠如主持嘅無綫旅遊節目《走過浮華大地》叫好叫座，所以有樣學樣呢？
聽聞呢個大製作，係亞視主要投資者王征落柯打叫做，雖然亞視冇廣告又冇收視，但都敢揼本去做，單係呢份勇氣已經可以頒個電視勇氣大獎！加上亞視近年好少有自家製作，𠵱家搞多啲，藝員自然多啲工作，總好過一味返洗腦班！不過，近排巴西爆發大型示威，治安相當差，亞視拉隊去拍旅遊節目，真係驚驚，不期然令人諗起亞視原本56周年台慶個「死」字logo。
蔡國威爆過程辛苦
亞視助理副總裁冼偉智前日就南美拍旅遊節目單嘢大賣關子，只係話：「仲傾緊，未落實。」不過蔡國威同林紫君就承認聽過，蔡國威話：「係有監製問過我做旅遊節目有冇興趣，因為過程相當辛苦，聽聞有幾個藝員人選。」講到巴西近日爆發大型示威，問到擔唔擔心？蔡國威話相信到時公司會有人帶，不過都擔心喎。林紫君就話：「聽聞公司搵兩個主持去巴西，驚就唔驚，公司會保護我哋嘅。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange