財經事務及庫務局局長陳家強又認叻嘞！噚日佢喺港交所（388）主辦嘅LME亞洲年會上，被問到點睇聯儲局主席伯南克明確提出退市時間表，局長話一早講咗啦，佢幾時變咗先知呢？
一早提咗大家要小心
陳家強話，政府同事，包括佢，多次提醒大家，美國退市迹象可能較好多人預期早，市場反應亦會比大家想像過敏，只要有迹象退市，市場波動就會大。
佢隨即回復教授本能，講起書來，指QE本身係會帶來市場波動，有升自然有跌，家陣係另一個新階段，會有更大波動，市民投資要有眼光判斷，留意風險喎。
講到興起，佢教埋何謂息口，息口有幾多種，指大家見到美國長息嘅影響較大，退市影響長息。市場拋售長期債券，令長息扯高，會影響不同市場對於長息嘅敏感度，或多或少影響香港金融機構對長息嘅睇法云云。哦，明晒。