「小賭王」何猷龍做賭做到去俄羅斯。佢做賭業一向唔局限喺澳門，早排以新濠博亞（6883）進軍菲律賓賭業，本月初又以新濠國際（200）去西班牙大搞賭場。
凱升或變賭股
佢持股37%嘅凱升控股（102）噚晚宣佈，計劃投資俄羅斯博彩同度假村發展項目。
凱升本月中開始停牌，市場傳過何猷龍注入賭業，公司開估，原來係「已簽署一份有關投資博彩及度假村項目的初步建議」，決定進軍俄羅斯，意味做開磁磚貿易生意嘅凱升，好有機會變身賭股。
股民睇完呢個通告咪心急想做嘢住，事關凱升仲要出一份有關呢項投資建議嘅公佈，所以要繼續停牌。
不過，呢間公司今年初供股集資8,700萬元，如果真係落實喺俄羅斯建賭場，幾千萬應該唔夠使喎。