意大利後防猛將一直江山代有才人出，由80年代尾馬甸尼，到90年代簡拿華路、尼斯達，除了好波穩陣零犯錯，仲要靚仔！建立意國足球防守與美男的優良形象！可惜時移勢易，看意軍在洲際國家盃3戰失8球的表現，無論堅穩防線與盛產美男的傳統均已守不住。有人歸咎於教頭柏蘭迪利，的確柏帥於帕爾馬及費倫天拿成名，皆以攻聞名，但後防欠缺頂級將才，才是更大原因。
廿年前睇意大利波，除老將如巴里斯，當打的如馬甸尼及哥斯達古達，久唔久防線總有新星橫空出世，未上位已盡顯功架；如89年領AC勇奪歐聯、只20出頭的馬甸尼及哥斯達古達，90年代拿玻里小子簡拿華路及拉素的尼斯達。但踏入2000年後，已鮮有聽聞意國新星後衞出現，3年前的世界盃，仍要以老將簡拿華路與森保達為重心，已見問題所在。
洲際盃中，被AC力捧的新人迪施基利奧錯漏百出，令意軍躉心寒；正選右閘阿比迪本是翼鋒出身，因年前AC無人可用，才將他改造為右閘。意軍防線如今只有基亞連尼及邦路斯兩位祖記兵較可靠，但與前輩們的星味仍有距離。明晚對西班牙，意軍係咪冇得打？又未必！雖然傷兵滿營，但意軍一向被睇淡才有更佳發揮，如柏蘭迪利真如賽前估計，派出基亞連尼、邦路斯及巴沙利於祖記夾慣的3人防線出戰，或能重演歐國盃分組賽好戲，起碼守到加時。
方柏翹
now足球評述員