近年投資者最常用RSI技術指標嚟量度超買/超賣訊號，恒指每逢跌到20左右嚴重超賣水平就買貨，80樓上嚴重超買就開始要沽貨。
不過技術指標越流行，就越嚟越唔準，恒指6月13日收20887，9 RSI跌到14.1以為勁超賣，跟住入市博反彈嘅話，唔夠兩周跌多1,400點，仲未肯定已經跌完，絕對係近五年嚟RSI最失效嘅一次。
失效原因之一，係因為阿爺救市取態改變。RSI主要量度恐慌同亢奮程度，以前阿爺一見跌市就會做嘢，令RSI跌到嚴重超賣自然有政策消息配合而反彈。但呢浸習李政權上場後第一次遇到市場恐慌，阿爺遲遲唔出手救市，傳到內銀違約都冇出招，令市場大失所望，恒指、H指跌完可以再跌，超賣完可以再超賣。近年倚賴RSI測市嘅晉佳，遭遇五年嚟首次太早估底，不過相信係最後一次，以後唔會盡信，寧願搵另一個更準嘅指標。
翠華候低撈貨
阿爺遲遲唔救內銀，反映中央放棄以往用真金白銀灑向出事單位嘅直接救市方法，改為以體制改革令發展路向更加健康，相信同一方針會套用喺唔同行業之上，令企業有更良好嘅營商環境，自行提升競爭力，再推動下一浸經濟增長，解決中國中等收入陷阱（國家進入中等收入行列，就難以提升成為高收入國家，令經濟增長放緩）。
晉佳估計，以後大國企唔再容易有阿爺水頭照頭淋，要自己提升競爭力增加盈利，但以大部份國企嘅官僚作風，你估改革咁易咩。冇咗阿爺關照，以後跑出嘅可能係經營策略靈活多變嘅優質民企。
講開競爭力，不能不提內地生意滔滔嘅翠華（1314），佢啱啱公佈全年業績只增長24%，表現令人失望，主要因為收入增長42%嘅同時，員工、租金成本成本分別升45%同59%，令利潤率收窄，證明公司控制成本能力有待考驗，歷史市盈率51倍，實在太貴，鬼叫𠵱家優質增長股買少見少，要等大跌市先至撈得落手。
晉佳
本欄逢周一、三及五刊出