唐佳跟劉家良出身粵語片時代，於63年在《南龍北鳳》兩人初擔任武術指導，之後一起過檔邵氏，為張徹擔任武指。唐佳昨日接受電話訪問時表示，從友人口中得知劉師傅離世，唐佳說：「冇見佢幾個月，上個月原本約佢飲茶，但佢唔舒服冇飲到，之前都係敍舊講吓以前嘅嘢。」
問到劉師傅離世可感到可惜？唐佳說：「冇計，年紀大嘛，人生七十古來稀，個個都輪住去啦。」他表示屆時會親自送別好友。
姜大偉昨日說：「初時做武師已跟劉師傅一直有聯絡，兩個月前仲有同師傅相約喝茶，當時已聽聞師傅患咗肺炎，喪失咗大部份免疫力，但師傅仍話：『冇事嘅，連醫生都話係奇蹟。』我同師傅嘅弟弟劉家榮通過電話，喺安排後事方面，如果須要幫忙嘅一定會竭力相助。」
曾與劉家良03年合作電影《醉馬騮》的邵氏高層黃家禧，昨在電話中回應說：「我哋識咗幾十年，佢係一個好有義氣嘅人，特別對佢啲下屬。當年拍《醉馬騮》嗰陣同我講，話想畀多啲佢班賣命手足演出，等佢哋搵到食，我同佢講話得，但要將十日拍攝期縮為五日，結果劉家良如期交貨。佢係不可多得嘅武術界前輩，對佢離世覺得好可惜。」
採訪：李森
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！