港股跌到七個一皮，政府話最少都有1%回報嘅第三批iBond（4218）今日掛牌，頓成市場焦點。投資者之外，最關心iBond表現嘅可能係耀才證券（1428），事關佢早前為吸客，向合資格新舊客戶提供105.5元回收優惠，使唔使蝕畀客戶要睇iBond表現。
回收價一路跌
耀才一路收客，一路因應市況調整優惠，將保證回收價逐步降至105元同104元，可惜噚日iBond暗盤價收103.3元，耀才似乎好有機會要硬食差價。耀才公關話，今日先講到幾多客戶用優惠買iBond，加上未知表現，未計到數咁話。
其實耀才原本都係諗住用優惠搶客，望就望佢可以蝕頭賺尾，搶到大客日後喺股票市場賺佢哋一筆。睇真啲，耀才同呢批iBond點都有啲關係，股票編號同係嗰四個數字。