由郭晉安、李思捷、單立文同曹永廉主演嘅無綫新劇《熟男有惑》，俾人話似足張東健主演嘅韓劇《紳士的品格》，雖然上周第一集高開29點平均收視（約186萬觀眾人次），不過成個星期拉勻平均收視只得26點（約167萬觀眾人次）。套劇收視唔高，不過投訴就勁多，通訊事務管理局噚日接到有關《熟男》總共79宗投訴，話劇中影射某外國歌星組合，有誣衊他人之嫌，又話套劇欠新意同抄襲。加埋無綫接到7個觀眾投訴，唔滿意諷刺他人整容，共有86宗投訴。
監製死撐：冇話整容
原來，上周三《熟男》有幕劇情辣到韓國人氣組合少女時代，話說扮Ugly Betty嘅林穎彤話就話飾演李思捷秘書，實質係幫李思捷老婆李詩韻贒實老公，林穎彤想向李詩韻請假兩個月去韓國，跟住攞住平板電腦顯示嘅少時靚相話：「我係去整容。」李詩韻怕林穎彤變靚令老公嗒糖，所以即刻炒咗林穎彤！估計呢段情節，令少時fans覺得套劇影射偶像而投訴，不過監製林志華噚日喺電話中解釋：「我哋係話佢想整到佢哋咁靚，冇話佢哋整容，只不過係話林穎彤想變靚啲啫，唔好誤會。」
至於劇中成日話要談一場「轟轟烈烈愛情」嘅單立文，噚日接受新城訪問時話：「係我心底好深層次嘅自己，不過絕對唔係賤男，只係想談轟轟烈烈戀愛嘅熟男。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange