港交所（388）舊年六月慶祝上市12週年時，宣佈斥資過百億元收購倫敦金屬交易所（LME），噚日挾住LME話事人身份慶祝13週年，果然係威係勢，除CY畀面做主禮嘉賓，股壇校長李福兆、殼后朱李月華、鷹君（041）主席羅嘉瑞都有捧場，星光熠熠。
噚日港交所喺金鐘一間六星級酒店包場搞慶祝酒會，現場有成850名嘉賓，相當墟冚。
嘉賓變龍友影相
嘉賓多之餘仲要有份量，好似近期曝光率高咗嘅李福兆，佢傍晚六點左右出現，一到場就變明星，吸引唔少嘉賓拎起手機影相，好多資深嘅金融界人士輪流捉住佢傾偈，就連CY都相當尊重呢位前輩，喺台上祝酒完畢，落台後專登走去同李福兆握手，寒暄幾句先走人。
眼見李福兆精神不俗，逗留約一句鐘，酒會完結後才離開。1986年四會合併，佢當選為聯交所主席，離港多年，今次應該係佢首次參加港交所週年酒會，唔知佢有冇百感交集呢？
前恒生（011）一姐梁高美懿就首次以港交所董事身份出席酒會，身為主人家一份子，佢亦着得靚靚迎賓。
金利豐（1031）老闆娘朱李月華亦好畀面，唔止留到酒會差不多完結，衣着打扮又比之前出席酒會樸素，明顯唔想搶主人家風頭。佢笑言，唔知係咪因為買咗LME，感覺今年港交所上市週年酒會迫咗好多囉。
李華華
mailto:[email protected]