疑似中債危機爆發，齋睇新聞絕不覺得會跌咁多，但聰明錢的消息總比散戶靈通，往往佢哋沽哂貨，最恐怖嘅消息先至浮面，屆時才會出現終極一跌。傳統智慧指出，強股跌往往是跌市尾聲，例如昨金山軟件（3888）及網龍（777）隊散晒，但尾聲時跌勢可以好恐怖，幾日可瀉千幾二千點，若然太早衝入場，隨時得不償失。冷靜啲，等多陣，寧願買貴啲都咪買錯。
上周提出08年以來的上升軌不容有失，當時仍有逾千點水位，眨下眼差300點就到，如失守19500，相信要睇萬八了。讀者先不要「嘩」，因隨時幾日就到。
內銀嚴重缺水，建行（939）為搶錢應急，一個月人仔定存息率竟高達3.8厘，存廿萬人仔一個月收番600幾蚊息，好過中iBond啦！有戰友問應否撈內銀，魏力建議不如開番個人仔戶口做定存算了。
大跌市之下仲有冇綠洲？達成集團（126）本周五公佈業績，料將理想，近日幾乎不受跌市影響，硬淨到暈，手痕想炒即日波幅，是較為理想之選。以「佳寧娜」品牌經營酒店、食肆的達成，早前以每股1.55元，向華南城（1668）配售12.39%持股，較現價高一成，具一定防守性，但周五前必須走人，以免業績後散水。
魏力
http://www.facebook.com/2012jason
本欄逢周一、二、四、五刊出