港股跌唔停，俾美國收水時間表嚇窒不特止，上周仲出現內地同業拆息突然抽高嘅現象，又有N單好似銀行違約、ATM無錢撳等捕風捉影嘅消息，令市場更憂慮水緊問題。唔少芬佬朋友對後市睇法甚為悲觀，說恒指見19000點唔出奇；樂觀啲，7月可能有一轉反彈，但到8月業績期，形勢仍然凶險。
雖然驚內銀出事的說法甚囂塵上，但市場人士大多認為，今次水緊，其實都是人行自編自導出來的一堂德育課，用意是警示各大銀行，唔好再凡事都以為阿爺會出手幫你包底，你自己借大咗條數出街、冚唔掂啲表外理財產品，唔該你自己拆番掂佢。雖知今年內地信貸大致仍維持十幾個巴仙以上嘅增長，但實體經濟增長得7%、8%，你話啲錢去咗邊？阿爺情願現在畀啲教訓你，等你緊張下，好過將來理財產品谷到爆煲，後果仲不堪設想。
既然阿爺有心讓拆息抽升，即現時市場風險仍大致在其掌控之中，未見即時爆煲危機，但內銀股仍然弱過藥煲。就當阿爺恐嚇呢招成功，銀行𠵱家決定收斂表外投資，都唔代表呢次financial failure可以當無發生過，總要有人負責埋單。
海迪