有人話，戴耀廷主張嘅和平佔中太「離地」、太中產，天水圍、深水埗唔明佔領中環係乜嘢，同爭取普選有乜嘢關係。為咗令佔中呢個concept更易入腦同入屋，新民主同盟范國威就整咗款「佔中無雙」遊戲卡，準備喺7.1遊行發售，內含大量香港政治人物對佔中嘅反應，同透過政治漫畫家馬龍同Cuson嘅大作，解釋佔中嘅意義，相信一卡在手，學識佔中so easy！
呢套佔中無雙遊戲卡有53張，好似啤牌咁，內有3張民主進程牌，係得分關鍵，其他嘅大牌，唔少都係香港嘅政治人物畫像。好似紅心A係戴耀廷，內附簡介話佢提倡佔中係非暴力，唔會隨便違法，民望度有+1分。紅心10長毛就印有佢名句，「不論運動成功與否，都只是香港抗爭運動的開始，不是終點」。成個佔中運動，「愛」字堆都有一定角色，淨心BB（不過牌上寫錯淨心個名）、元秋、葉劉、鄭耀棠、禿鷹平日批評社會運動、拖延普選、出陰招打壓7.1遊行嘅事迹，都係呢副牌上有記載㗎。范國威話，呢套遊戲卡係由香港著名桌上遊戲設計師朱國華設計，50蚊套，扣除成本後，收入會捐畀「佔中運動」。
mailto:[email protected]