銀根緊張，內地大中小行化身「息魔」，陷入瘋狂搶錢狀態。不過，10個煲得9個蓋，冚得一時冚唔到一世。𠵱家內銀就如一個理財不善嘅債仔，過去唔夠錢還債，老奉都有阿爺頂，今次阿爺唔肯出手，呢個絕望的債仔惟有借街數。碌爆卡就卡冚卡、數冚數，係人都知長遠一定爆煲。
菲菲一直覺得，內地金融體系錯得離譜，但千錯萬錯，都係貪污嘅錯。須知道錢就得咁多，銀行借畀邊個除咗取決信貸紀錄，仲要睇埋畀幾多賄款。假如貪官A叫銀行高層B借錢畀某人C，最後C走數，A同B收咗黑錢，ABC三贏。但銀行缺水點算，等阿爺用公帑放水囉！
朋友講早年有人借某大行2億人仔，話去大西北投資，結果𠵱家連影都冇。菲菲相信2億只係冰山一角，走數大有人在，唔係點解內銀股價咁平，都冇人肯接貨？貪污問題一日唔解決，內銀就會繼續借錢畀啲冇能力還錢嘅人，然後繼續債冚債等打救。內銀咁搞法，真係想升都難。
Fifi
本欄逢周二、四刊出