香港著名賽車手歐陽若曦，星期日喺法國勒芒24小時耐力賽交出好成績，佢喺GTE Am組別代表意大利AF Corse車隊贏得亞軍，成為呢個有90年歷史嘅世界最著名耐力賽，首位殺入三甲嘅華人車手；對於同組嘅丹麥車手西蒙遜，開賽10分鐘就撞車身亡，同賽嘅Darryl就覺得好難過！
歐陽若曦效力嘅AF Corse車隊，同兩位意大利車手Lorenzo Case及Piergiuseppe Perazzini輪流駕駛458 Italia戰車出戰，結果喺24小時內賽咗305個圈，以1圈之微屈居亞軍。
同組車手撞車身亡
雖然只得第2名，不過，呢位33歲香港車手賽後都好滿意今次成績，仲將喜悅擺上自己facebook，佢話：「現場超過25萬名觀眾打氣，感覺好正。」賽後接受訪問時Darryl補充：「24小時耐力賽變數好多，唔容許大意，比賽時仲要落雨，但車隊準備充足，令到我哋能夠以近乎完美嘅表現完成賽事。」
勒芒分4個級別車種較量，與Darryl同組角逐GTE Am級嘅34歲丹麥車手西蒙遜，喺上星期六開賽冇耐就發生致命意外，Darryl都感到好難過，會向佢嘅親友送上最深切慰問。
至於最高級別嘅LMP1，丹麥車手基斯甸臣駕駛Audi戰車成功第9次奪冠，賽後佢難忍男兒淚，接受訪問時仲話將冠軍送畀同鄉兼好友西蒙遜，以及自己剛去世嘅父親，作為對佢兩個嘅最後敬意。頒獎禮舉行前，賽會安排1分鐘默哀，以悼念西蒙遜不幸離世。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange