錯，要認；打，就要企定。呢啲就係做香港人嘅規矩。我，係香港人；我，錯了；我，今日就企定俾大家打，亦同時想向大家認錯。
咁孫柏文錯咗啲乜？咪就係之前叫大家買嘅珠江鋼管（1938）。噚日珠管大插特插，因佢喺6月都未完前，宣佈盈警，oh shit。唔怪之得，4月時佢哋好興奮咁叫我去睇佢哋間廠後，到6月冇咗件事！佢哋話今年1至6月嘅頭半年業績盈利，「或會較去年同期有大幅減少」，理由係有得投標嘅項目，好多押後及拖慢來做，連帶批管道嘅合約亦延遲。
頁岩氣革命不敵水緊
跟住仲要之前珠管管理層因對需求睇好，所以起咗唔少新廠，新增咗五成產能量，逐步喺舊年尾到今年初興建好。呢個「增產能」計劃，原本係我睇好呢間公司嘅理由，因為反映公司覺得有好多生意來緊。不過𠵱家接唔到單，仲比以前多咗唔少燈油火蠟嘅錢使咗。
我一路都話，珠管係做管道，特別係高科技天然氣管道嘅龍頭。如果佢哋都投唔到單，等於呢上半年啲新興市場貸款萎縮、拆息扯高，祖國人行唔放錢出來，嚴重影響珠管產品嘅買家。原本我仲信能源，特別係頁岩石中嘅天然氣，應該吸引到資金，點知一樣中招。
冇計，真係要等伯南克去到8、9月轉軚，宣佈再加大量寬。而當馬雲隻阿里巴巴，旗下嘅支付寶，話大家嘅account餘額有3厘回報時，人民銀行要谷高傳統銀行嘅存款利息，谷到理財產品唔夠鬥時，先會放錢出來。今次係人行打佢哋監管唔到嘅shadow banking之唯一一招，呢招「人一招」，唔知係咪任志剛教。
原來當全球水浸5年時，好多人剝咗泳衣吊吊揈，唔知幾爽。𠵱家小小潮退，就發現原來個個都冇着泳衣呀！冇辦法，原來當頁岩氣革命遇上貨幣供應減慢增幅時，係貨幣供應贏。珠管要等到中期業績出時，先再有得分析。各位，對你哋唔住，sorry。
孫柏文
獨立股評人
http://facebook.com/shuen
本欄逢周二、四刊出