甄子丹上年因為接拍咗內地片《特殊身份》，搞到是非不斷，同趙文卓、內地導演檀冰嗌晒交，之後有人請水軍喺網上係咁攻擊佢，煩到佢幾乎患上抑鬱症，之後子丹就搵內地律師告檀冰侵犯名譽，要求佢書面賠禮道歉，並賠償損失500萬元。
莊澄否認趙文卓傳聞
呢單官司噚日喺北京海澱法院第三度開審，戴住墨鏡嘅甄子丹喺律師同助手陪同下出庭，而被告檀冰都有現身，審咗兩個幾鐘先結束，但仲未有結果，要排期續審。子丹出法庭後同記者話：「我相信中國法律會給我一個合理公正的審判結果。」上完庭子丹即刻飛返香港拍陳德森嘅《一個人的武林》。
因為《特》片，子丹同趙文卓都搞到勢成水火，點知呢幾個月有傳聞話子丹個老友黃百鳴要簽趙文卓6部片約，仲搵佢做《衛斯理》男主角，聽聞呢件事令到子丹好唔開心，覺得百鳴唔撐佢，所以《葉問3》先至會唔想傾落去。但馮仁昭噚日問過百鳴公司高層莊澄，佢話：「據我所知，公司冇計劃要簽趙文卓咁多片約，《衛斯理》男主角亦都唔係趙文卓。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！