新一輪環球金融風暴，風眼已由美國退市，轉至中國水荒危機，阿爺刻意為經濟瘦身，寧願內銀高息兼送米送油搶錢，也不願放半點水，如此壓力測試，長遠可防止中國式泡沫爆破，絕對係好事，但股市短暫（希望係）劇痛難免，戰友要有心理準備。
既然估個市仲有得跌，不如做定功課，等恐慌性一刻向優質股埋手。產銷電訊及電子學習產品嘅偉易達（303），有美國經濟復蘇概念，又有高息支持，絕對係低吸好選擇。截至3月底止，偉易達全年賺2.02億美元，按年增長5.4%，毛利率由32%微升至32.2%。之前本欄提過，偉易達中期手頭現金突然大減，而應收賬及應付賬續升，但全年業績相關數據明顯好轉，相信中期係受季節性因素影響，所以股價亦在放榜後持續造好。
偉易達噚日逆市升0.5%，收報113.70元，現價息率5.5厘，市況差劣，強股始終有倒下嘅一天，用7厘息作入市指標，即候股價回試90元樓下才吸納。
唐牛