普通一對夫婦離婚，只需向家人交代，但如果呢對夫婦係一間市值逾200億元嘅上市公司大股東，就要出通告澄清了。玖龍紙業（2689）噚日就要出通告澄清，董事長張茵同行政總裁劉名中「經已離婚」嘅傳聞係完全不正確。
直指報道嚴重失實
有內地報章報道，張茵同劉名中經已離婚，聞說集團內部對市場時不時傳出呢類消息大感無奈。公司噚日中午就嚴肅處理，出通告話，諮詢過張茵同劉名中後，獲通知有關報道係錯誤同完全不正確，嚴重失實云云。
除咗張茵，SOHO中國（410）董事長潘石屹與張欣兩夫婦亦經常被人傳婚變，大概一般人都認為一對夫婦好難共富貴，加上真有大企業老闆婚變，如萬科老闆王石舊年底傳出有小三，龍湖地產（960）主席吳亞軍又真係同丈夫蔡奎離婚。