球會炒教練經常發生，但喺電視直播先知道被炒就真係少見。英冠球隊白禮頓啱啱喺英國時間星期日晚，宣佈將領隊普耶解僱，出呢段即時新聞嘅時候，咁啱普耶正喺BBC電視台做緊洲際國家盃賽事節目嘅客席講波佬，一場「死亡直播」就咁呈獻畀觀眾睇。
白禮頓喺上季英冠攞第4，成績相當唔錯，不過球隊喺上個月升班附加賽準決賽已經被水晶宮踢出局，隨即亦傳出球會同領隊普耶鬧不和。白禮頓以違反球隊紀律為名，喺上個月暫停咗普耶連同佢啲副手嘅職務，要接受紀律聆訊，點知呢單嘢都未搞清楚，普耶就已經冇得撈。星期日洲際國家盃西班牙對尼日利亞場比賽，BBC請咗普耶嚟做嘉賓講吓波經，唔知係咪白禮頓有心整蠱，喺呢個時候公佈解除同普耶嘅合約，即時生效。
普耶：我會上訴
反正西班牙都贏梗尼日利亞，到半場嗰陣節目主持馬克卓文即刻問吓普耶嘅即時感受喇，普耶話自己之前乜都唔知，估唔到球會畀個咁大驚喜佢：「我完全冇同球會有任何聯繫，冇短訊冇email，今次BBC真係無端端執到好料，有幾可會有個領隊會喺個直播節目度收到大信封，真係夠晒驚喜。我覺得就算球會要炒我，都應該畀個機會大家可以溝通吓，𠵱家有佢講冇我講真係唔妥。事到如今，我唯一可以做就只有向球會作出抗議，提出上訴。」不過白禮頓球會喺周一出聲明反擊，話之前已經同普耶表達咗有關決定。
大熱過檔紐記
普耶帶領唔到白禮頓上英超，相信好大程度係球會炒佢嘅原因；不過其實普耶都唔使咁愁，佢唔單止隨時好快脫離失業大軍之餘，仲可能喺下季搖身一變，做埋英超領隊。有傳紐卡素有意搵佢接替柏度領軍，英國博彩公司SkyBET將普耶成為紐卡素下任領隊嘅賠率，由佢被白禮頓炒前嘅5倍急升至2.1倍，過咗舒利亞就變成頂頭大熱。