恒地（012）主席李兆基（四叔）上月初開始冇做東亞（023）非執董，由佢大仔李家傑好似世襲咁頂上。李家傑對東亞主席李國寶呢位世叔伯應該幾好，否則都唔會見到東亞股價最近持續下跌，真金白銀拎近千萬元出來增持啦。
聯交所資料顯示，李家傑上周二以平均價28.231元，增持東亞35萬股，涉資988萬元。可惜東亞跟住大市繼續跌，李家傑增持呢批貨，旋即損手，按噚日收市價27.25元計算，賬面唔見34萬元。
不過幾十萬對於李家大少而言，應該都係濕濕碎，佢做咗東亞董事兩個月就高調增持，表示支持，象徵意義大，反正阿爸主力增持恒地。李家傑原先都持有東亞，增持後持有178萬股，噚日市值4,848萬元。