【銅鑼灣】熊黛林（Lynn）同郭富城7年情玩完，Lynn嘅天王嫂美夢成空，好在有家人幫佢治療情傷，日前佢同媽咪、哥哥兩公婆去完峇里享受陽光與海灘，前晚一家四口又出動溫馨家庭樂，Lynn心情大靚睇嚟已經走出失戀陰霾。
前晚8點幾，Lynn一家四口現身銅鑼灣時代廣場，夜麻麻仲戴黑超嘅Lynn拖實媽咪行去耀華街，佢哋上咗百樂中心食日本菜，嘆足兩粒鐘先至走人，由於離開嘅時候落緊雨，Lynn見到地下濕滑，就再拖住媽咪隻手過馬路，其間佢仲好小心照顧媽咪，認真孝順女。
搣阿嫂面珠
雖然哥哥同阿嫂成雙成對，好在Lynn冇觸景傷情，仲好鬼馬咁用手𢭃阿嫂下巴，又搣佢面珠仔，Lynn搣到笑得好開心，明顯佢同屋企人感情好到不得了，之後佢哋去停車場攞車，由Lynn做司機車屋企人返歸。
至於Lynn嘅舊愛城城上周五凌晨12點幾亦喺銅鑼灣出現，不過佢就孤伶伶一個人喺翠華食完嘢走，之後佢去報紙檔買雜誌，然後返上波子揸車走人。
採訪、攝影：徐錦池、彭琮然、吳耀輝、朱志聰
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange