噚日《城市論壇》討論功能組別存廢時，落起滂沱大雨，反映連個天都唔鍾意功能組別，現場音響更加鮮有故障。正發表偉論嘅民主黨主席劉慧卿即時大喊，話做乜要滅佢聲，主持人謝志峰請卿姐繼續講，因為只係現場喇叭有問題，直播冇問題。城市論壇噚日原本擺空凳，因為論壇曾邀請提出廢除功能組別嘅行會召集人林煥光、「杰」出涼粉張志剛、自由黨、工聯會、經民聯、馬逢國等人，個個都話冇時間唔嚟。經常做台下觀眾嘅自由黨邵家輝話，如果邀請佢，佢會出席，但係sorry，唔知係咪未夠班，城壇只邀請黨發言人田北俊同主席周梁淑怡。