前公民黨成員司馬文最近喺網上鬧爆滙豐，投訴喺菲律賓馬尼拉同家鄉荷蘭機場用提款卡，撳唔到錢，嬲到寫電郵畀滙控（005）CEO歐智華（誤寫為主席）反映，竟然得到對方嚴肅處理，叫當紅嘅零售銀行及財富管理業務阿頭范寧（John Flint）回覆兼耍冧，司馬文呢次威晒！
提款卡轉晶片出事
今次事件可以話因為金管局為加強保安，要求銀行今年三月，將提款卡同信用卡，由磁帶卡轉做晶片卡而起。
滙豐同銀聯合作轉做晶片提款卡，惟銀聯卡喺中國同亞洲區外，提款機覆蓋率唔高，部份國家直情冇得用。轉卡後，客戶喺外國撳錢亦要先啟動相關功能。
司馬文投訴喺馬尼拉攞唔到錢，應該係佢未啟動海外提款功能。至於荷蘭機場撳錢失敗，就唔關張卡事，而係滙豐喺當地冇提款機網絡！精靈嘅范寧回覆時，冇提馬尼拉，可能費事再激親對方，仲承諾未來數月畀張新嘅晶片提款卡司馬文，新卡會用VISA Plus網絡。
據聞，滙豐同VISA Plus合作搞嘅晶片提款卡有望喺今年10月推出，到時喺歐洲嘅覆蓋面會大好多。滙豐發言人向海外提款不果嘅客戶致歉，希望客戶喺海外提款出問題可以通知滙豐，佢又提醒客戶，想喺海外提款，記得先在港啟動提款功能。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange