中情局叛諜斯諾登喺香港爆完大鑊後，目的地究竟係莫斯科、委內瑞拉、古巴、冰島，莫衷一是，單係佢行蹤已經夠拍電影，同樣行蹤極受關注嘅黃色膠鴨（Rubber Duck），目的地一樣咁多，想見多次巨鴨嘅港人要留意喇，佢將於9月後，到港人熱門短期旅遊熱點——台灣環島遊呀。
基隆及高雄大熱
巨鴨離開香港後，會去美國賓夕法尼亞州匹茲堡、中亞阿塞拜疆宣揚和平，近日又確定佢會喺9月會趁北京國際設計周，到北京暢游，聽聞會喺北京三環內嘅公開水域現身，詳細地點未定。不過，善於搞山寨製作嘅強國，多個省市都有假巨鴨出沒，唔知屆時巨鴨之父荷蘭藝術家霍夫曼Florentijn Hofman去到北京後，見到咁多翻版巨鴨，情何以堪。
去完中美大國之後，巨鴨聽聞過咗9月，就喺台灣現身。現時熱傳嘅兩個地方就係基隆同埋高雄，台北嘅機會亦都好大，隨時嚟個環島遊。香港人最鍾意請一兩日假去台灣短遊，加上台港只係一小時機程，相信迷戀巨鴨嘅港人，要與佢再次合照絕非難事。
為咗歡迎巨鴨，台灣基隆市議長黃景泰已經成立個「黃色小鴨來基隆」嘅facebook page，已有逾1.1萬人like，另外該市家下諗緊盡快解決該市旭川河口垃圾淤積同惡臭嘅問題，否則環境骯髒，巨鴨嚟到，都冇人想嚟啦。
李八方
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange