下周一公眾假期，有關當局驚香港青年無所事事上街閒逛，特意大搞活動嚴陣以待，最正梗係「香港巨蛋音樂節」，99蚊可以睇晒韓國女歌手BoA、本地班霸RubberBand同Mr.等，吸納咗近2萬市民。計我話，如果想減少市民回歸紀念日街上遊蕩，最好梗係靠足球啦！
想講的當然不是07年康文署免費開放球場給市民享用的舊橋，試想想：當啟德體育城可容納5萬人的主場館落成後，連同近4萬座位的香港大球場，香港便有兩個大型足球場地。據聞中央外匯儲備逾3萬億美元，一於拎10億8億出嚟，請晒香港球迷最愛的曼聯同皇馬嚟踢友賽，一隊踢大球場，一隊踢啟德；再唔係，當啲錢係活性乳酸菌，拎夠100億！請埋利物浦、阿仙奴、巴西、洛杉磯湖人、邁阿密熱火……開晒旺角場、小西灣、紅館，一於嚟個環球體育巨星匯；分分鐘吸引20萬人去晒球場睇波慶回歸，街上仲點會有人呢？
如果球迷又想上街又想睇波，都得！一於實施彈性遊行時間，不過球迷要夠齊心，4萬人於大球場睇完波，齊齊操去中環政府總部；仲可check吓警方公佈的遊行人數，會否明明全個球場啲人過晒去，都話得4,000人。
可惜啟德體育城下周一未落成，當日洲際國家盃決賽又已踢完，體育迷可以做乜？其實仲有網球大滿貫溫布頓！按賽程當日應該打到男女單16強，不過好似下午6點半先直播，都係行完街先返屋企睇啦。
方柏翹
now足球評述員