最鍾意戴帽嘅歌手側田（原名羅定偉）原來有位數口好精嘅妹妹，佢胞妹羅定潔（Roxane）家陣喺帝盛酒店（2266）打工，幫「老虎仔」邱達昌位千金邱詠筠管數，職位係財務副總裁。
唔搶風頭好識做
Roxane同側田唔多似樣，但係都屬於靚女一名，眼大大，笑得好甜，佢同側田其中一個最唔同嘅地方，應該係頭髮，Roxane有把長長秀髮㗎。可惜華華同佢食晏當日，邱詠筠在場，估計係免得搶走靚老闆風頭，佢點都唔肯俾人影相，舉起手機都嗌唔好。
Roxane同側田都係唱得之人，佢哋三叔羅尚正（Ted Lo）係本港著名編曲、監製同爵士樂鋼琴手。Roxane曾經做過和音，唱過過百首廣告歌，傳聞佢都想過入行做歌手，但就被側田勸止咗，變成走去做酒店副掌櫃。