近年港甲有唔少大學生，部份係讀完書先全職踢波，亦有部份踢波同時兼顧讀書。效力公民嘅門將謝德謙同守衞黃耀富，響10年決定一齊讀遙距大學，經過3年努力，噚日喺嶺南大學舉行嘅畢業禮，戴住四方帽同着住畢業袍接過證書；從此港甲又多兩個大學生，認真值得恭喜。
阿謙、富仔奮鬥3年
雖然話職業球員平時一日練波唔多過120分鐘，就算連埋搭車都係3、4個鐘，時間比較多，但踢咗咁多年，要佢哋重拾課本，按時按候返學，始終唔係易事；而佢兩個喺3年前知道菲律賓比立勤國立大學，喺香港開咗個體育發展及管理學士課程後，就決定一齊報名，仲要同時獲得取錄，自此兩人結伴，每星期三晚變番做「學生哥」。
經過3年邊踢波邊讀書嘅日子，二人噚日喺家人、女友同朋友見證下，順利畢業，之後見佢兩個笑晒口咁同攬住家人、女友影相留念，確實戥佢哋高興；始終踢波唔可以踢成世，有張大學沙紙，對將來發展點都會有幫助。
28歲嘅謝德謙就話，細個完全冇諗過可以有大學學位，家陣能夠圓咗呢個心願梗係開心，亦會鼓勵隊友趁後生進修充實自己。啱啱讀完足總教練D牌嘅阿謙，已諗緊將來向門將教練方向發展，希望呢個學位可以幫到佢。
阿謙同富仔行完畢業禮，喺新球季展開前繼續各有各忙；之前同女友遊完日本嘅謝德謙，噚晚已經起程去加拿大同美國度假。至於31歲嘅富仔近排忙到暈暈哋，因為早前獲介紹去咗無綫講世青盃，希望將來退役有多條出路；同時又要跟香港5人代表隊練波，備戰即將喺南韓仁川展開嘅亞室運足球賽。所以，佢噚日行完畢業禮，就即刻趕去練波，而港隊大軍今日就起程。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange