賭王千金何超蓮同歌手吳克羣之前傳冷戰，吳克羣偷嗒混血台模Rima，後來吳克羣似乎翻撻成功，噚日凌晨超蓮同吳克羣又再喺微博高調傳情，雖然之後急急刪走，可惜經已俾人截圖。
為超蓮改圖
上星期五，超蓮喺微博話：「Imax版超人，怎會有這麼帥這麼完美的人啊。」噚日朝早，超蓮又喺微博擺吳克羣嘅大頭相，仲話：「這個人說我寫錯了？他自己才是超人，麻煩轉發。」即係吳克羣私下同超蓮講，超蓮話超人係完美嘅留言係錯，自己先係超人，暗示自己係超蓮心目中又帥又完美嘅人，冧到爆。
中午時分，吳克羣喺自己微博擺自己合成做超人嘅相，留言：「請各位不要洩露我是外星人的身份！」嚟回應超蓮，不過超蓮之後刪除自己微博中吳克羣張大頭相，改為上載狗仔大頭相，順便澄清：「看到之前那個微博的有緣人們，其實我是為了贏得打賭才po的，結果是我贏了，哈哈哈我要繼續睡了晚安。」對於同超蓮高調互動，吳克羣噚日回應時變得低調，只係話：「那只是朋友間的玩笑，不想在公開地方傳來傳去。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange