上周五港股低開413點，下晝一度倒升，收市跌119點，成交增加到972億元，反映好友力量大增，短期內有機會重佔上風。
長線技術分析晉佳之前講過睇淡，短線又點呢？恒指由5月21日高位23446，跌到上周五低位19969，冇咗3,477點。由5月23日出現第一個突破性裂口開始，指數逐步下跌，去到6月13日、20日出現兩個大型裂口，成交明顯增加，似係消耗性裂口，上周五低開咁多，但可以即時補回裂口，形成較長陽燭，走勢好轉。
壞消息暫時出盡，潛在好消息冇人肯信，相信短線悲觀情緒已經反映哂，淡友有機會先行撤退，本周第一個目標係補番上周四裂口，反彈番去20896左右，之後相信會chok一輪，唔排除會插到接近上周五低位再反彈。至於終極目標，參考番走勢近似嘅跌浪，2011年8月同樣瘋狂超賣後反彈，大半個月反彈幅度達跌浪0.5倍，約2,000點。假如情況相若而上周五已見底，反彈目標21700，預鬆少少睇21500，可能3、4周完成，同4月18日低位阻力相若，接近250日線21565。
短炒網龍 目標22元
要反彈去21500，唔會幾日搞掂，重點係反彈到多咗人信個市變番風平浪靜，解除戒心，然後高位接貨，個市先有動力再跌。
如果閣下做慣長線操作，呢輪可以唔買住，再等機會。如果選股博短線反彈，都唔係睇基本因素，技術走勢同動力更重要，一係買超殘股，一係買超強股。上周五風水輪流轉，超殘嘅內銀、煤炭、鋼鐵、水泥股有反彈，前排強到冇人有嘅濠賭同科網股就大插，科網股當中，網龍（777）逆板塊跌勢而上升，睇番個圖，今個月每逢跌到18蚊就會急彈，上星期五亦唔例外，講圖講動力就fit晒。
呢轉晉佳相信一定有幾隻二三線股破頂，睇到大家high晒，炒作情緒番晒嚟，暫時睇，潛力最高非網龍莫屬，目標價睇22蚊，跌穿6月14日低位17.54止蝕。
晉佳
本欄逢周一、三及五刊出