無綫最近搞咗個專畀藝人一展歌喉嘅歌唱比賽節目《星夢傳奇》，成日收到有疑似幕後人爆料話造馬，又指有高層施壓，話要畀啲唔唱得、不過靚仔靚女、知名度較高嘅藝人出戰，搞到一啲明明好唱得嘅藝人連上台機會都冇。其實諗深一層亦無可厚非，話晒呢個係無綫節目，同台慶頒獎禮一樣，梗係捧自己友啦！
家明被Out
前晚《星夢傳奇》喺將軍澳電視廣播城錄影第二集，今集加入咗李璧琦同新人張明偉一齊對戰，璧琦獲無綫厚待，着咗條雪白靚靚裙，出場仲有煙霧效果，成個仙女駕到咁款獻唱歌劇《Think of me》，即俾巫啟賢柴台話：「TVB慳啲啦，好貴㗎啲煙！唱歌劇連室內溫度都要調節得好好，唔可以有煙㗎！」璧琦唱咁高層次嘅音樂唔係人人識聽，連評判葉蒨文都話唔識畀分。原來璧琦讀書時主修音樂，仲有十年教唱歌經驗，咁都上台參賽，公唔公平就見仁見智，不過佢最終都輸畀上集冠軍鄭俊弘，屈居做阿二。
上集有巫啟賢同周啟生鬥嘴，今集就玩好多煽情嘢，鄭俊弘、羅鈞滿同張景淳三個大男人輪流爆喊。鄭俊弘未唱已好感觸話：「《Angels》呢首歌送畀遠方嘅公公，佢由細湊到我大，但離開時送唔到佢最後一程，好自責。」最後佢以179.5高分攞第一，評判都話俾佢感動到，巫啟賢仲讚佢唱得好過好多出碟歌手：「𠵱家啲歌手唔掂，無綫老闆應該簽佢做歌手啦，今年8月我喺香港開演唱會，請埋佢做嘉賓。」至於俾人話唱歌似讀書嘅袁偉豪就包尾，同尾二嘅「家明」張景淳齊齊出局。而梁烈唯就排尾三，處於出局邊緣。
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange