經過總決賽7場激戰，熱火終於擊敗馬刺衞冕NBA總冠軍，大戰過後眾將梗係要輕鬆吓，難得邁阿密一間酒吧老闆拍心口，任班熱火球員喺上周四晚嘅慶祝晚會上任飲，人出酒佢哋出口，結果就喪飲咗10萬美金（約78萬港元）香檳。
小馬前年開P冇得free
熱火上周四晚擊敗馬刺封王，職球員完成記者會同梳洗過後，就帶埋女友老婆轉場去夜總會狂歡，難得68歲嘅總裁萊利都畀面出席，連老闆都批准，一班球員梗係放心盡玩。夜總會老闆葛文拍心口畀佢哋任飲，結果開咗100支750毫升同3支3公升香檳，單係酒價已經要10萬美金。咩叫主場之利？就係連玩都可以唔使埋單，事關兩年前小馬作客擊敗熱火封王，又係去呢間夜總會狂歡，但老闆就唔肯免費，要小馬老闆古賓畀9萬美金埋單。
講番上周四嘅慶祝會，最high當然係總決賽MVP勒邦占士，一入場仲同歌手Drake合唱，不過大帝冇因為飲大兩杯就搞搞震，全程都同未婚妻Savannah一齊。為咗備戰季後賽，大帝4月開始仲停晒玩Twitter、Instagram等社交網絡工具，冠軍到手自然開通番，佢仲喺Instagram上載自拍片，瞓係梳化晒命話自己拎到兩次冠軍㖭。大帝今年9月就會結婚，估唔到感染埋隊友獲迪，「閃電俠」當晚仲乘機向女友Gabrielle單膝下跪求婚，2010年同前妻離婚嘅獲迪，睇嚟好快再做老襯。
丹尼爾格連踩場話巧合
熱火狂歡夜，竟然嚟咗位不速之客、馬刺射手丹尼爾格連，佢事後喺Twitter解釋到夜總會只不過巧合，仲講對馬刺好忠心，好希望輔助鄧肯同柏加拎總冠軍。馬刺輸波後亦都搭飛機返到聖安東尼奧，機場仲有過千名球迷支持，馬刺躉真係夠晒熱情。
熱火嘅慶祝活動又點會咁少，美國總統奧巴馬仲已經玫電祝賀，周一佢哋就會喺邁阿密市巡遊，不過因為之前波士頓馬拉松爆炸，今次警方保安嚴密咗，唔畀市民帶背囊，希望一切愉快順利。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange