果然係心理戰大師！摩連奴（圖）只係靠電話，就令到車路士球員心悅誠服。好似放緊假嘅拉美利斯就話：「我好意外，竟然係摩連奴親自打畀我！佢話喺國米同皇馬教波時，已經想買我，所以佢好高興我終於成為佢嘅球員。」另外，比利時新星奇雲迪布尼都收到電話，佢經理人話，摩佬向迪布尼解釋下季嘅部署，希望可以令呢位上季外借嘅球員安心啲。