男人去滾，最重要是不可讓另一半知道，為了去滾，又要編出一個又一個的大話掩飾。好好先生森美深明此道，下月舉行的talk騷，便會剖析「滾」的動機及過程，亦會講到近來令香港人「滾」的事情。不過森美多年來都係得個講字，事關從未試過去滾，只敢在思想及言語上出軌。
撰文：李珮洳
唔滾唔知身體好！只是電影對白。事實上滾是百害而無一利，男人瞞着另一半去滾要花很多心思，因為整個過程要不停講大話去掩飾之前的大話。已為人夫人父的森美，一直予人好好先生的形象，在下月20至23號於伊館舉行的talk騷「森美要滾」，乖乖的他居然探討男人去滾的動機及犯案手法，莫非他在這方面有豐富經驗？
口花學老竇
自認是小男人的森美強調多年來沒有對另一半不忠，他說：「我呢啲擺明係小男人心態，唔會亦唔敢『沙沙滾』，從來都只係得把口，成班朋友都係得個講字，冇一個會去實行呢件事。」至於森美所指的「口頭言語上的滾」，只是問問身邊的男性朋友出來聚會時，有沒有靚女介紹，最終的局面都是全男班，他續說：「你話我細膽又好、得把口又好，我真係得把口風流，大家須知道出去滾個危機性同傷害性係好大㗎，真係唔好因為一時嘅快感去做呢件事。建立一個家庭需要好多年時間同感情，但係令一頭家散就可以好快，當中仲會傷害到好多個人。」與太太結婚多年的森美，承認間中會背着妻子，作出思想上的出軌，他笑說：「有邊個男人唔睇靚女㗎，靚仔我都會睇啦。所以我成日都會諗吓啲靚女㗎，諗還諗，都唔敢諗得太露骨。可能我思想好傳統，呢樣嘢亦係受爸爸影響，我細個時阿爸撩吓賣點心個阿嬸，都會俾人話口花花㗎。」
想被人崇拜
森美覺得令一個男人去滾的最主要的動機，除了是生理上的需要及發洩外，最想要的是被人崇拜的感覺，他表示：「唔知大家有冇發現，男人出邊個女人未必靚過屋企嗰個㗎，其中一類去滾嘅男人係希望搵番喺屋企得唔到嘅被崇拜感。」接着森美再將自己的個案作例子，他說：「即係好似我哋見到班fans，即時會覺得好有虛榮感、優越感，佢哋叫我合照時會覺得好似萬人迷，嗰吓真係由八両金都變成林峯呀！」之後森美去到「出軌勝地」砵蘭街拍照時，途中有很多不同年齡層的女士爭相要與他合照，他即笑笑說：「你睇吓幾多女人當我林峯一樣呀，呢啲就係男人好需要嘅被崇拜感啦！」
森美認為男人去滾的另一個原因，是他們控制不到下半身，而女人就控制不到上半身，經常發脾氣，他說：「好多人都話男人用下半身思考，有部份會將性同愛分開，我都聽過唔少男人喺老婆大肚時忍唔住去滾。」隨即問到森美於太太懷孕時，有否閃過一絲去滾的慾望？他語氣堅定地說：「呢樣嘢對我嚟講唔係咁緊要，我認為只要有道德就會控制到下半身。」在訪問結束前，森美強調talk騷上的「滾」的事例，全屬於朋友的經驗。相信這句話，是對梁太說的！
港人最火滾
講完肉體上的滾，便到思想上的滾。森美觀察到近年有很多事令香港人火滾，例如樓價瘋狂飆升，令很多香港人都不能安居樂業。中港兩地的衝突，令香港人更加看不過眼，以上種種話題都會在騷上與大家分享，他說：「其實𠵱家啲內地人嚟香港搶購奶粉藥物，咪好似香港人當年去日本藥房狂買藥一樣，又試過炒貴晒啲日本貨。我咁講唔係想話番香港人，只係希望大家有時冷靜啲去睇，有時個人太火滾對身體唔好㗎！」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！