碧咸（圖）繼續遊中國，履行佢做中超大使嘅工作，上周六嘅行程仲好豐富㖭。上晝咸爺喺杭州同中超球會綠城交流，參觀吓球會設施，同舉行座談會；之後佢就休息咗陣，欣賞中國嘅傳統音樂，聽吓靚女彈古箏，同埋試飲功夫茶；去到夜晚，碧咸仲入場睇綠城主場對北京國安嘅中超比賽，喺咸爺支持下，主隊以2:1反勝對手。