【拆局】
今次政府向立法會申請撥款擴建堆填區，最終又要政務司司長林鄭月娥親自披甲上陣，有官場及立法會議員直言，外界太「神化」環境局副局長陸恭蕙的能力，以為憑她與泛民關係，就可以為政府護航，忽略陸對政治形勢脫節，亦難以憑個人之力，扭轉外界對梁班子不信任。
與政治形勢脫節
有立法會議員直言，環境局局長黃錦星自上任以來民望欠佳，亦遭外界質疑他對環保政策熟悉程度，所以當日找來與泛民、環團關係好的陸恭蕙做副局長，不少人認為可助黃拆政治炸彈，但擴建堆填區事件中，縱使陸對環保政策十分熟悉，但對政治形勢分析明顯脫節：「佢（陸恭蕙）搵政黨游說，講喺環保上面擴建堆填區有幾需要，但佢都唔知我哋講環保之餘，仲要講政治，支持政府會連累輸民意，佢完全冇諗呢個問題。」
亦有官員指市民對梁班子不信任，單靠陸恭蕙的能力，亦難以爭取民意支持政府：「𠵱家政府民望低，政府講乜市民都唔信，佢（陸恭蕙）只係環境局副局長，好難做到乜嘢。」林鄭月娥民望高之餘，又是政府第二把交椅，由她親自披甲上陣，自然更有力說服政黨及市民：「但問題係，以後係咪大大小小難題都要林鄭出手？咁局長、副局長仲用嚟做乜好？」
《蘋果》記者